نظم المحاسبة
قلم أ.د. عمرو حسن الحسني
#بوست_الجمعه النهارده عن "نظم المحاسبة" .. أيوه اللي هي المادة بتاعت كلية تجارة دي .. هتقولي ايه ده انت دخلت في البيزنس يا معلم .. واالعة..🤪..
هو فعلا انا داخل في بيزنس 🖐🖐
بس انت كمان داخل و كلنا داخلين
كلنا داخلين في بيزنس مع ربنا .. هتقولي استغفر ربنا بسرعه .. ايه اللي بتقوله ده..
١- يا عم بالراحه مش أنا اللي بأقول.. ربنا نفسه اللي بيقول
إِنَّ الَّذِينَ يَتْلُونَ كِتَابَ اللَّهِ وَأَقَامُوا الصَّلَاةَ وَأَنفَقُوا مِمَّا رَزَقْنَاهُمْ سِرًّا وَعَلَانِيَةً يَرْجُونَ تِجَارَةً لَّن تَبُورَ (فاطر29)
و كمان بيقول
إِن تُقْرِضُوا اللَّهَ قَرْضًا حَسَنًا يُضَاعِفْهُ لَكُمْ وَيَغْفِرْ لَكُمْ ۚ وَاللَّهُ شَكُورٌ حَلِيمٌ ( التغابن17)
بيزنس ده و لا مش بيزنس يا متعلمين يا بتوع المدارس .. شوفت أن عندي حق
٢- كلنا مهنتنا الاساسيه التجارة .. انت نازل كل يوم من بيتك تشتغل شغلتك بتاعت الدنيا .. موظف و لا طالب و لا دكتور و لا عامل و لا أي شغله.. و لكن هناك شغلانة أساسيه أوعي تنساها هي التجارة مع الله ..زي كل يوم ما بترجع البيت تشوف صرفت كام (مدين ) و كسبت كام( دائن)..
لازم يوميا تحسب أعمال الخير و الحسنات(دائن) و الذنوب و المعاصي (مدين)
و طالما دخلت في مجال التجاره مع الله يبقي لازم تبقي دارس مادة "نظم محاسبية" عشان تعرف الحسابات هتبقي إزاي.
٣-النظام الدفتري : 📒📓📕📗 أشهر نظام و كلنا عارفينه...اللي هو تراكميا تحاول تجمع أكبر قدر من الحسنات عشان دفاتر الحسنات (دائن) تتعدي دفاتر السيئات .. و تثقل موازينك :
فَأَمَّا مَنْ ثَقُلَتْ مَوَازِينُهُ *فَهُوَ فِي عِيشَةٍ رَاضِيَةٍ * وَأَمَّا مَنْ خَفَّتْ مَوَازِينُهُ * فَأُمُّهُ هَاوِيَةٌ * وَمَا أَدْرَاكَ مَا هِيَهْ * نَارٌ حَامِيَةٌ*
اللي هو بلغة الكورة ...زي الدوري كده .. تجميع نقط
٤- نظام السلم و التعبان: 🐍🏗(ده تشبية من عندي طبعا)
و ده أخطر نظام ..فاكرين لعبة السلم و التعبان بتاعت زمان اللي هي لو في اللعب وقفت في خانة أول السلم هتلاقي نفسك ارتقيت فجأة درجات كتير اوي .. و لو وقفت على خانة أولها تعبان تلاقي نفسك نزلت و اتخسف بيك الأرض و خسرت كل حاجه ..
وهناك دلائل علي" السلم " من السنة
حديث أبي هريرة رضي الله عنه: بينما رجل يمشي فاشتد عليه العطش فنزل بئرا فشرب منها ثم خرج فإذا هو بكلب يلهث يأكل الثرى من العطش، فقال: لقد بلغ هذا مثل الذي بلغ بي، فملأ خفه ثم أمسكه بفيه ثم رقي فسقى الكلب، فشكر الله له فغفر له.
و دلائل🐍 "التعبان" من السنة
قال رسول الله ﷺ قال : ( عُذّبت امرأة في هرّة ، سجنتها حتى ماتت ، فدخلت فيها النار ؛ لا هي أطعمتها ، ولا سقتها إذ حبستها ، ولا هي تركتها تأكل من خشاش الأرض )
يعني ربنا غفر للراجل كل شيء بسقيا كلب ..و أدخل الست النار في قطه؟؟!!!! بس كده .. ؟؟ ..
اه بس كده امال انت فاكر ايه حضرتك ..🙂 ربنا خبير عليم .. الكون بتاعه يتصرف فيه كما يشاء
ده كلمة واحدة انت مش واخد بالك منها و لا حتي فاكرها ممكن تبقي أكبر تعبان (فاكرين.. كان فيه في اللعبة تعبان كبير كدة)
قال رسول الله ﷺ: "إن الرجل ليتكلم بالكلمة ما يلقي لها بالاً يهوي بها في النار أبعد ما بين المشرق والمغرب"
بلغة الكوره ..حاجه عاملة زي ضربات الجزاء الترجيحيه.. ضربه تجيبها تاخد بطولة .. ضربة تضيعها تخسر بطولة🥅⚽️
٥- نظام البونص: نظام البونص ده bonus معناها الزيادات و المكافآت ﴿مَثَلُ الَّذِينَ يُنْفِقُونَ أَمْوَالَهُمْ فِي سَبِيلِ اللَّهِ كَمَثَلِ حَبَّةٍ أَنْبَتَتْ سَبْعَ سَنَابِلَ فِي كُلِّ سُنْبُلَةٍ مِائَةُ حَبَّةٍ وَاللَّهُ يُضَاعِفُ لِمَنْ يَشَاءُ وَاللَّهُ وَاسِعٌ عليم)
اللي هو تطلع من جيبك ١٠٠ جنيه .. ربنا يحسبهالك ٧٠٠ أو ٧٠،٠٠٠ جنية
ايه ده بجد .. اه و الله..ربنا كريم يا جماعة.. مش هيحاسبك زي شريكك المناكف اللي معاك في الشغل اللي بيحاسبك علي القلم الجاف
٦- نظام الهدف الذهبي⚽️⚽️: اللي هو تبقي عاكك الدنيا طول الماتش و تجيب جول في الوقت الاضافي .. الماتش يخلص و تاخد البطولة
زي سحرة فرعون كده.. اللي دخلوا الجنه و كل رصيدهم من العبادة سجدة واحدة أخلصوها لله و إيمان وقع فجأة في قلوبهم
"فَأُلْقِيَ السَّحَرَةُ سُجَّدًا قَالُوا آمَنَّا بِرَبِّ هَارُونَ وَمُوسَىٰ"
مكانش في دفاتر حسنات أصلا .. و لكن العمل بنظام الهدف الذهبي أدخلهم الجنة
٧- نظام التصالح الضريبي: و هو أنك تتهرب من أداء الواجبات و تقصر فيها .. و لكن تدرك غلطتك بقرصة ودن ليك من ربنا .. فتحاول تراضي ربنا و تصالحه
" وأقم الصلاة طرفي النهار وزلفا من الليل إن الحسنات يذهبن السيئات "يعني ربنا يشيل من عليك جزء من دفاتر السيئات
ده مش بس كده
ده ممكن يشيل كل دفاتر السيئات و نبدأ صفحة جديده زي في الحج كده مثلا
(من حج فلم يرفث، ولم يفسق، رجع كيوم ولدته أمه)
٨- ليه ربنا بقي عمل كل هذه الأنظم المحاسبيه؟
وجهة نظري عشان تبقي عينك في وسط راسك علي تجارتك .. و واخد بالك أوي .. و عمال تحسبها و تبص كل شوية علي الدفاتر زي ما بتبص علي عداد الكهرباء .. و عشان لا تحقرن من المعروف شيء .. فكل ما تيجي مثلا تطلع صدقة و الشيطان يخليك تكسل أو تتراجع أو تبخل.. رد عليه قول له .. مش يمكن الصدقه تبقي
أو السلم أو البونص
و كذلك لا تحتقر من الإثم شيئا و كل ما تعمل سيئة مستهترا بها تخاف أحسن تطلع 🐍
٩- حاجه كمان .. عارفين أهل الأعراف
اللي عملوا ٣٥٥٦٦٦٥٤٢٢٤٦٧٧٨٨٦٤٣ حسنة
و ٣٥٥٦٦٦٥٤٢٢٤٦٧٧٨٨٦٤٣ سيئة
(متتعبش نفسك .. هو نفس الرقم 😉)
تخيل واقفين بين الجنه و النار ناقصهم حسنة واحدة بس 😱😱
تخيل الحسنة دي كانت ممكن تبقي تسبيحه .. ربع جنية صدقه .. شق تمرة .. و عشان كدة ..تخيل نفسك طول الوقت و انت في الدنيا أنك من أهل الأعراف في الآخرة اللي ناقصهم حسنة واحدة.. و هتلاقي نفسك مش مستخسر أو مكسل عن فعل أي خير مهما صغر
١٠- بعد كل هذة الانظم المحاسبيه المعقدة
أوعي تنسي أن أنا و انت و كلنا حتي أفضل الخلقﷺ .. لن يدخل أحد منا الجنة بعمله .. و لكن بفضل الله و رحمته .. عدلا لا أحد يستحقها .. و لكن فضلا .. ربنا كريم جواد
بس خلي بالك هو كمان عزيز جبار منتقم
وَلِلَّهِ مُلْكُ السَّمَاوَاتِ وَالْأَرْضِ ۚ يَغْفِرُ لِمَن يَشَاءُ وَيُعَذِّبُ مَن يَشَاءُ ۚ وَكَانَ اللَّهُ غَفُورًا رَّحِيمًا (الفتح14)
حاسبوا أنفسكم قبل أن تحاسبوا و زنوا أعمالكم قبل أن توزن عليكم
جمعة مباركة و بيزنس مبارك
